Thautang, sumlepai hamsatna leh galkap kitangsapna hangin Mogok (မိုးကုတ်) leh Momeik (မိုးမိတ်) township te panin kinungkik hi ci-in TNLA General Secretary Bogyoke Thar Bon Kyaw (ဗိုလ်ချုပ် တားဘုန်းကျော်) in Dec 1, 2025 in ama social media tung pan lai suaksak hi.
Tua laisuahsakna sungah Mogok leh Momeik township ngah nadingin hong kipiakhia galhangte leh supna a thuakte tawh a kibangin ka dah mahmah uh a, mawhmaina zong hong ngen nuam ung cih pulak hi.
TNLA lunggulh bangin Mogok khua pen Ta’ang State sungah lutsakkik nading leh Ta’ang minamte khutsung tunsakkik hamtang ding pen a ki lamen hi cih zong pulak beh hi. Tua banah tulaitak pen nekloh buanlawh kihi phot a, a hi zongin a hanciamte adingin lametna om veve ding hi ci-in pulakkhia hi.
Spring revolution adingin kum 10 sung i khol neihsa leh siamna tampite kipiakhia in kidokhawm a, TNLA pen thuciampelh kipawlna a cite’n thuman tak tawh etkik ding zong hanthawn hi. Tua khit kum 3/4 sungin galkap tampi leh sumlepaai tampi bei ahih manin leibat pen dollar a billion val ta hi cih zong gen hi.
Tua banah TNLA pattahsa mipi galkapte’n Mogok township a lak zawh ding uh zong lametna leh lunggulhna om hi cih zong genbeh hi.
1027 minpua galdona ah TNLA makai-in belpawlpihte tawh Mogok leh Momeik township te a lazo uh ahi hi. Ahi zongin 2025 October bei kuanin Sen te palai sepna tawh Sen gam Kunming khua ah (ကူမင်း) ah SAC leh TNLA te 9 vei kimuhkhopna pan Mogok leh Momeik township te pan TNLA nungkik in langnih kido kikapna khawlsan ding cih thukimna a om ahi hi. Sen gam palai Mr. Deng Xijun (မစ္စတာတိန့်ရှီကျွင်း) leptuahna tawh kithukim in suaikaihna a nei uh ahi hi.
Tulaitak Mogok township pan TNLA te a pusuah khit hangin Mogok leh Momeik ah SAC leh PDF te kikapna om paisuaklai hi.
Source: BBC Burmese
……………………………………
