A beisa Dec 30, 2025 in Chin Brotherhood in CB kipawl zawh kum nih cin kimuhkhopna online tung pan bawl uh a, tua sung ah KIO/KIA General Gun Maw in thugenna nei hi.
Tua thugenna sungah kipawlkhopna ah kei ka za tua hi, nang na za tua hi cih pen hong nawngkai sak mahmah thu ahih manin tua dan omlo-in galvai, ki-ukzia leh mipite tung thu vaihawmziate ah kigawm khawm a kimakaihna kisam mahmah hi ci-in pulak khia hi.
Tua banah kigawmkhop ding i gen ciangin mualtung mite a dingin a haksa mahmah thu khat hi cih zong gen a, Kachin state ah CB te a pai lai un zong KIO/KIA tuahkhak thute genna kinei hi ci-in General Gun Maw in gen hi.
Luituite a kigawm ciangin Ayeyarwaddy guntui a piang mah bangin kipawlna tuamtuamte kipawl khawm leng gam adingin na lianpi a sem zo kisuak ding hi. Spring revolution pen Federal Democracy lam nadingin hun hoih pen ahih manin khatlekhat kizopna ah suakta tak a kizop ding thupi mahmah hi cih zong genbeh lai hi.
CB pen Dec 30, 2023 in ZFU/PDF – Zoland, CDF – Mindat Leh CNO/CNDF kipawlna thum tawh a kipankhia ahi hi. Tua nungah MTC/MDF, CDF – Kanpalet, CDF – Matupi Brigade 1 tawh kigawm beh in Chin Brotherhood cih kipawlna tuni ciang dong a om suak ahi hi.
Source: BBC Burmese
