■ News In Brief ⸺ THUTHAK TOMKIM ⸺

News In Brief

Published on: 2020-07-31 15:42:49

■ India te huhna tawh Tedim –Rih kikal aki to thak ding lampi project ah inn leh lo pawlkhat sukha ding ahihman in inn mun logam sum te tungah huhna sum MMK million 100 val piakna Tedim Township, Haimual khuathak ah ki nei hi.

■ July 29, 2020 ni-in Tedim Khuapi, No. (1) leh (2) B.E.H.S sangpi kihong kik ta hi. Tedim Township sungah B.E.H.S leh Sub-H.S sangpi 27 a om lakah 10 kihong ta ahi hi.

■ Irrawaddy Division, Hinthada Township, Eainpet Ohsuh ah guntui khanluatna hangin July 30, 2020 ciang inn 70 val bangin inn leh lo nusia in mun muanhuai nate ah kihem phot uh ci hi.

■ 21 Century Panlong Khawmpi a 4 veina ah Political Party te aitangin SNLD party in thugenna nei ding hi, cih thu kiza hi. A masa lam khawmpi te ah NLD, USDP leh ANP party te in thugenna nei ngei khin uh ahi hi.

■ 2019-2020 Laisin kum Tan 10 Result pen August 9, 2020 ni zingsang nai 1:00AM hunin Ministry of Education Website www.moe.com pan ki tangko khia ding a, August 10, 2020 ni-in sang khempeuh ah lai tawh kisuang pan ding hi, ci-in MOE Deputy Director General Dr. Tin Maung Win in gen hi.

■ Japan gamah Liberal Democratic Party pan thukhun lamtawh kisai kipawlna in China(Sen) bawl ahi Tik Tok leh application pawlkhat zatloh dingin kumpi ngetna ka nei ding uh ci hi.

■ Leitung bupah Technology Company a nasia pen 4 te ahi Amazon, Facebook, Apple leh Google makai CEO te American Lower House of Parliament in July 29, 2020 ni-in thudotna nei uh ci hi. Hih thu kidotna ah China(Sen) Company te in US Company te kiang pan Technology tawh kisai pilna pawlkhat gu/etteh uh hiam cih te hi. Facebook CEO Mark Zuckerberg in hih tawh kisai siksan theih ding lai pawlkhat om in um ing, ci-in gen ci hi.

■ Abeisa 2019 Kum bei kuan leh 2020 Kum kipat lamin Australia gamah gamkatna hangin ganhing Billion 3 val si a, a tawm pen mi 33 sihlawh in gamkatna vekpi Acres 27.1 million val kang tum hi, ci-in Khuahun lam tawh kisai kantelna abawl te in gen uh hi.

■ Malaysia Prime Minister lui Najib Razak in golhguk nekna hangin thukhen zum in Kum 12 thong khiat ding leh Malaysia sum Ringgit Million 210 liau sak dingin thukhen hi. 2015 Kum in 1 Malaysia Development Berhard Fund pan US Dollar Million 9.9 val golhguk nekna hang hi a, a zenzen in Najib Razak in liausum Ringgit Million 210 apiak kei leh Kum 5 thong kiat beh lai ding ci hi.

■ 2020 kum kipat pan kha 5 sungin pulnatna hangin Leitungbup ah khualzinna lam pan sumlut US Dollar 320 billion bang kisum hi, ci-in July 28, 2020 in UN in tangko khiatna nei uh hi.

■ July 30, 2020 ni Leitung bupah Covid-19 natna ngah Tein 170 val(17,057,700), asi Tein 6 leh lang val (667,744) leh adam kik Tein 95 val (9,986,005) phata hi.

■ USA in Myanmar gam tungah US Dollar 90,000 summan Covid-19 dalna PPE puan pawlkhat pia khia hi, ci-in USA Embassy in gen hi. 2020 Kum January kha pan tuni dong US Kumpi in Myanmar gam tungah US Dollar 18.5 Million huh khin ci hi.

■ A beisa Nipi ni (July 26)in US Galvanleng P-8A Anti-submarine plane kici khat in China gam laizang neh Shanghai khuapi huam sung Km. 76.5 tan bang va thuk lut vingveng a, tua bek hi loin EP-3E Reconnaissance plane kici khat zong Taiwan gamgi lam China gam sung Zhejiang leh Fujian kuampi lamah va lut zialzial uh hi, cih kiza hi.

■ Leitung bup Tuukpeng Club tamman pen 5 te in 1. Real Madrid (Sterling Pound 1.289 Billion) 2. Barcelona (Sterling Pound 1.280 Billion) 3. Manchester United (Sterling Pound 1.190 Billion) 4. Liverpool (Sterling Pound 1.143 Billion) 5. Manchester City (Sterling Pound 1.018 Billion) ahi uh hi, ci-in Brand Finance Football in ciaptehna nei hi.

....................................................................

Source : 7day news, , Eleven Media, Myanmar Times, VOA, Irrawaddy, Voice of Zomi, Times of India.

Close[X]

© Copyright 2020 - The Tedim Post. Powered by Zawikawm | Privacy Policy