News In Brief ⸺ THUTHAK TOMKIM ⸺

News In Brief

Published on: 2020-07-24 09:55:59

■ Chin State, Paletwa Township sung a galtai mipite ading in World Food Program(WFP)in nek leh dawn Metric Ton 165 val va puak thei ung, ci-in Myanmar WFP thunei Stephen Aderson in gen hi. Tulaitak galtai mi 9000 val om uh ci hi.

■ Chin State, Hakha Khuapi ah 1998 Kum a akilam ahi Vomtumaung Stadium Chin State Kumpi vaihawmna tawh Budget 633.6 Million tawh akipuah kik laitak hi a, 45% nasep kizo ta ci hi.

■ Northern Shan State, Hsipaw Township ah Myanmar Army leh SSPP/SSA te kidona hangin mipi 400 val inn leh lo nusia in galtai uh hi.

■ Mualtungmi party tuamtuam ahi KSPP, KySDP, KNDP, CNLD leh MUP party pan khangno makaite kigawmkhawm in Kachin gam, Myitkyina khuapi ah July kha sungin kimuh khopna nei ding hi ung, ci-in KSPP Youth facebook page pan in tangkona nei uh hi.

■ 2020 Kiteelpi ah Myanmar gam Kumpipa U Win Myint in Yangon Division, Tamwe Township pan dem ding a, State Counsellor ahi Daw Aung San Su Kyi in Yangon Division, Kawhmu Township pan in dem ding ci hi.

■ July 21, 2020 ni-in Kumpi lam pan Tan 9 tungsiah sanghong kik ding a cihna tawh kizui in Myanmar gambup ah Tan 9 tungsiah sang om vekpi 7,173 lakpan cidamna lam tawh akituak sang 3,999 kihong sak kik hi, ci-in State Counsellor Daw Aung San Su Kyi facebook tungtawn in kiza hi. A kihong kik sanglak ah private sang pen 764 pha ci hi.

■ 2020 kiteelpi Myanmar gambup ah a khatveina vote(mee) pia thei ding mimal 5 million kiim om hi, ci-in UEC in gen hi. 2015 kiteelpi lai in Myanmar gambup vote(mee) pia thei mimal vekpi lakpan in 70% kiim in vote pia uh ci hi.

■ USA in Covid-19 natna dal nading in Myanmar gam tungah US Dollar 1.95 Million piak beh ci hi. 2020 Kum Febuary Kha pan tunidong US in Myanmar gam tungah US Dollar 18.5 Million huh khin ta hi, ci-in US Embassy pan thunei ten gen uh hi.

■ 2020 kiteelpi ah NLD party pan a dem ding min list teng July 23,2020 ni-in tangkona nei uh hi. Meekuang lui dingte lak pan numei 20% leh lokhomi 12% kihel a, mun 1,132 ah ka dem ding uh hi, ci-in Dr. Zaw Myint Maung in gen hi.

■ Sen(China) gamah akibawl Corona virus dalna zatui pen Brazil gamah July 21, 2020 ni-in mihing tungah sinna kinei hi, ci-in zatui lam tawh kisai kantel kipawlna ahi Sinovac in gen uh hi. Hih zatui sinna ah volunteer mimal 9000 tungah kisin ding ci hi. Tulaitak Brazil gam ah COVID-19 natna nei mimal 2.1 millions val om a, asi mimal 82,000 phata uh hi.

■ USA in China(Sen) Company 11 te Blacklists ah koih ci hi. China gam a Uighur Muslim te tungah China(Sen)kumpi in simmawhna leh ngongtat nate hang ci hi. China(Sen)gam bupah Uighur Muslim te 10 Million val om hi.

■ July 23, 2020 ni Leitung bupah Covid-19 natna ngah Tein 150 val(15,265,081), asi Tein 6 val (624,370) leh adam kik Tein 80 leh tul 70 val (8,708,362) phata hi.

....................................................................

Source : 7day news, KSPP Youth FB, Eleven Media, Myanmar Times, VOA, Taungzalat Time, Aungsan Su Kyi FB.

Close[X]

© Copyright 2020 - The Tedim Post. Powered by Zawikawm | Privacy Policy