Guest Editorial... KINEIHKHEM A OMLO NUNTAKNA (Integrity: Becoming a person of great character)

Editorial

Published on: 2020-07-19 10:13:54

By Samuel Nang Sian Khual (Samuel Nas)

Leitung khantohna tawh kizui-in van lei (shopping) khawng zong online vive pan hong hi pian ta hi. Lemtang ahih laitakin leikhialh baih mahmah hi. Lim a i muhte ciang pen na hoih mahmah thei a, ahizongin i kongbiang hong tun taktak ciang a lim tawh na kibang hetlo thei mawk hi. Hici dan a tuakkha ngei om ding hi hang.

Lawmte khat in zong khatvei a sum neih sunsun tawh puan khat vaikhak hi. Hong tun ding kal bang ngaklah zawzen. Hong tun phet leh, a tuamna bang nawh hon mahmah hi. Tua leh lawmpa lam-et hong bang nawn ta lo! Naupang puan na hi mawk hi. Aman vaikhak khial maw ahih kei leh limtak en lo? Bangmah i gen theih om nawnlo hi. Amah bel a kah bang suak phial mai. Kei lah ka nuihza lua. Va nuihsan keei ding lah ong lem pha lo. Kidek teta in om hi. Na pen a limah hoih tuak mahmah ahih laitakin atakah na hoih hetlo thei hi.

Vante bek hilo, i nuntakna mahmah zong hih dan hi thei hi. Mite hong theihdan leh i hihna taktak pen mual nih thum na kihal thei hi. I hihna taktak pen mite hong muhloh lai a i omdan na hi zaw a, ei sanga niamzawte i bawl danah i lungsim taktak kilangzaw hi. Phatuamna hong piakik thei dingte tungah na hoih sep pen haksa lo a, ahizongin i hoihna hong thukkik theilo dingte tungah i gamtatdan in i hihna lim gen zaw hi.

I tuhun nuntakzia ngaihsun leng, screen mai ah kitu-in leitung bawltawm (virtual world) sung khatah i hun tamzaw bei hi. Hih sungah pen mit tawh muh theih ciang a etlawmna kithupi ngaihsut hi. Mel hoih, taksa hoih, inn hoih, motor hoih cihte mat tam kipia hi. I kidop kei a, i kikepsiam kei leh ei zong leitung in thupi a sak puatham hoihna ciang ah kitulmawhin kipumbuai thei hi. Mite pahtak ding utna lel khawng tawh ei hihna lopi a va kilakgawp (show-off) theih hi. I theihloh kalin mite Like khutpi peuh na kisuak thei zanzan hi.

Tel ni. Puatham hoihna ciang bek pen a hawmpi suak thei a, sunglam hoihna mah thupi zaw den hi. Pasian in zong thupi a sak leh mat hong piakna pen i lungsim na hi zaw gige hi. Mite in a puatham muhtheih ciang tawh thu hong khen uh a, Pasian in ahihleh i lungsim tawng hong encik hi (1 Sam 16:7). Mite hong muhna sangin Pasian hong theihna thupi zaw den hi. Ziakip (character) i neih ding a kisapna hih bangte khawng ahi hi. I sunglam man masa leh a pualam zong hong man ding hi. Lungsim hoihte kiselsim cih om loin a nuntakna uhah etlawm takin hong palhkhia hamtang hi. Sunglam leh pualam a man tuaktuakte pen mi thuman (man of integrity), ziakip a nei (man of character) i cihte hi.

Mi thuman cih ciangin a kineihkhem, huihbung, leh sunglam a nget nuntakna tawh a kilehbulh lian nuntakna hi a, thuman thutak thei bek hi loin nuntakpih ngiat hi. A kam in thu hoih gen a, a nuntakna in zong thu hoih gen hi. Khial ngeilo, mawh ngeilo, mi bucing cih bang hilo hi. Adam suante lakah mi bucing (perfect) kuamah ki-omlo hi, Jesu lo buang. Mi thuman cih teh kineihkhem cihte zanglo cihna hi zaw. A thanemna kithei-in kipuahphat sawm a, a thahatna midangte neu-etna in zang lo hi. Itna tawh mi lian mi neu angvanin khual kim hi.

Mi thumante pen amau hoihna amau kigentawm kul loin a kianga mite in gengen zaw uh hi. Kikhop hun sung khawng bekah kha mi lo a, mipi mai leh kuama muhlohna ah a mel leh a zia kilamdang lo hi. Hici bang mite mahin innkuan sung, pawlpi, leh minam hong makaih uh ciang mainawtna om hi.

John Maxwell in a gen theih zel khat pen, “Makai khat peuhpeuh a tungin a kam tawh a thugen kithupi ngaihsut a, a sawtna ciang a nuntakna tawh a thugen kilimngaih zaw hi” ci hi. Maan sa ing. Khat leuleu ah, “Mi thumante makai lian suakpah tuan lo uh a, ahizongin makai lian khat pen mi thuman ahih kei leh a zakiatna ding nai cihna hi” ci hi. I pianzia - i mel, i vun, i tun cihte pen ei deihteel theih hi kei. Ahizongin mi thuman i hih ding leh hih loh ding pen bel ei deihteelna hi.

Thuman leng i hamphatna ding pen i lungsim tawldam zaw banah ei leh ei zong kimuanna (confidence) hong neisak hi. Hih pen Mark Twain in a gen theih zel, “Thuman bek mah gen den lecin na thugen sate na ciapteh den kullo ding” cih tawh hong kinai pian. Kineihkhemna pen bel tawlhuai ahih banah hong meidawisak hi. Khang tampi a kimang ding thupha ngahna lampi pen thumaanna hi zaw hi.

Tua ahihleh bangci thumaan ding? Kumpi David in Late 15 sungah kiciantakin hong hilh hi. Tuate tom cikin ensuk pak leng:-

1) Thuman bek mah gen ding (tg. 2). Hih pen i kampau ah thumanna hi.

2) Mi gensiasia lo ding. Mite siatna ding vaihawm lo ding (tg.3). Hih pen mite tawh kizopna ah thumanna hi.

3) I pahtak ding tak pakta ding - migilote hi loin Pasian a zahtak mite (tg.4a). Hih pen i lungsim ah thumanna hi.

4) I thuciam ah dingkip ding. Haksa phial ta leh i kamciamsa tangtungsak ding (tg.4b). Hih pen i gamtatzia ah thumanna hi.

5) Sum vai ah huaiham lo ding. Golhguk zang lo ding (tg. 5). Hih pen i nekzonna ah thumanna hi.

Hici bang mite pen Pasian pahtakna a ngah mite hi a, ziakip a nei (a ling ngeilo ding) i cihte hi. Khatveivei en pen a tuama Pasian thupha ngahna ding khawng kihanciam keei zel hi. Tua sangin Pasian in thupha a piaksa lampi tot ziau pen pilna hi zaw hi. Pasian thupha piaksa lampi pen thumaan lampi ahi hi.

(Etkak - Beyond Success by John Maxwell; The Blessed Life by Rick Warren).

Close[X]

© Copyright 2020 - The Tedim Post. Powered by Zawikawm | Privacy Policy