News In Brief ⸺ THUTHAK TOMKIM ⸺

News In Brief

Published on: 2020-07-12 23:01:38

■ Myanmar gam Kineih siam minthang Academy Kyaw Hein Kum 73 in July 11 ni-in Australia gam, Kanbara Khuapi ah hong nusia hi. Ama sihni pen kineih siam minthang Dwe sihzawh kum 13 cin ni tawh kituak citciat hi. Academy Kyaw Hein in Myanmar Film Academy Award 5 vei ngah ngei hi.

■ 2020-2021 laisin kumah Zato siamah(Nurse) dingin mimal 4,300 kisam ding hi ci-in Union Minister U Myint Htwe in gen hi. Zato siamah pen 2017-2018 kumin 1,700 leh 2018-2019 kumin 3,500 kiim sapna kinei ci hi.

■ June 29, 2020 ni-in Myanmar Army leh RCSS te kikapna hangin khuasung mi khat in sihlawh ahihman in Shan State, Kyaukme khuapi ah mipi 1000 val in lungphona nei uh hi.

■ Myanmar gamah Covid-19 natna hong tunzawh kha 3 sungin mimal 470 in kisih bawlna(Suicide) hangin si uh ci hi.

■ Covid-19 natna kidal nading in Myanmar gam tungah USA in US Dollar Million 16.5 huh ung, ci-in US Embassy zum thunei ten gen uh hi. Abeisa Kum 20 sungin USA in Myanmar gam tungah US Dollar Billion 1.3 val huh khin uh ci hi.

■ 2020-2021 kum pilsinna sanginnte pen July 21 ni-in hong kik ding cih kumpi lam pan geelna tungtawn in sangkah hun ding pen nikhat nai 4 sungta bek hi ding hi, ci-in Education Department pan thunei ahi Dr. Tin Maung Win in gen hi.

■ Myanmar Army leh AA te kidona hangin Rakhine State leh Chin State, Paletwa ah galtai mi 81,637 bang om hi, ci-in UN(United Nations) in gen hi. Chin State, Paletwa ah galtai mi mimal 8000 val bang om ci hi.

■ USA in Japan tungah US Dollar Billion 23 man Gal vanleng F-35A namte 63, F-35B namte 22 leh F-135 namte akigawm 105 zuak dingin ki thukimna nei uh hi.

■ India Bollywood kineih siam minthang Abhishek Bachchan Kum 77 in Covid-19 natna ngah ci hi. Tulaitak Mumbai Zato ah zato alup laitak hi.

■ Nepal gam, nitumna lamah guah tamluatna hangin tuikhang gawp a mi 40 bangin sihlawh khin uh in mipi 10000 sim bangin inn leh lo nusia in tai uh hi.

■ India gamah July 11, 2020 ni nai 24 sungin Covid-19 natna ngah 27000 kibehlap hi. Tulaitak India gam pen Leitung bupah Covid-19 natna ngah tampen 3 na hi-in India gambup ah natna ngah Tein 8 val (849,553), asi Tul 20 val(22,674) leh adam kik Tein 5 val(534,621) pha ta uh hi.

■ July 10, 2020 ni-in Singapore ah kiteelna om a, abeisa hun a azo ahi People's Action Party(PAP) mahin zo leuleu hi. PAP party in Singapore gam pen kum 60 sung bang a makaih khin ahi hi.

■ 2020 kumsung in huih siangtho lohna hangin Asia gam, khuapi 11 ah mimal 153,600 in sihna thuak uh a, sumtang US Dollar 82.4 billion bang supna om hi, ci-in huih lam tawh kisai thukan ahi Greenpeace kipawlna in gen hi.

■ July 12, 2020 ni Leitung bupah Covid-19 natna ngah Tein 120 val(12,741,287), asi Tein 5 leh lang val (565,719) leh adam kik Tein 70 val (7,023,260) phata hi.

....................................................................

Source : 7day news, Eleven Media, Myanmar Times, DVB News.

Close[X]

© Copyright 2020 - The Tedim Post. Powered by Zawikawm | Privacy Policy