TUKPENG HILHNA NEI

Local News

Published on: 2020-07-09 14:07:41

Tedim – July 9

Myanmar Selected U19 ah akihel ngei Tg Van Lal Chhuanga in Tedim Khuapi, Lawibual veng, khangsang tualpi ah Tukpeng uk naupangte hilhna July 6, 2020 ni-in nei hi cih thu kiza hi. A mah pen nidang in Lawibual veng a teng ngei Pu Dal tum tupa hi a, a pa Pa Zir Lianthanga hi in tulaitak Shan State, Tachiliek Khuapi ah teng uh hi. A beisa hunin Magwe FC leh GFA FC ah zong kimawl ngei ci hi.

Tedim Khuapi amuh zia tawh kisai in “ Tedim Khuapi pen ka pu/ka pate khan khiatna ahihmah bangin it mahmah ing. A hawh danin ki ngaihsun keng. Inn a ciah hing.” ci- in Tg Chhuanga in gen hi.

Tukpeng hilhna tawh kisai in “ Naupangte Tukpeng a uk dan uh thangah huai mahmah sa ing. Ahih hangin ahilh/lamlak ding kisam hi. Tua bek thamlo Tukpeng tual gina zong kisam mahmah hang. Tedim Khuapi ah Fustal Tual khat bek neih hamtang huai hi.”

“Tutung naupangte tungah Tukpeng kimawl zia, Tukpeng uk khat ii zuih ding leh pelh ding thute, ih ki suihpihte zahtak siam nading cihte tampi tak hun kangah sungin hilh sawm ing. Khangnote tung ka gennop khat pen tawm khat minthang pian leng ki phasak baih lua hi hang. Ih minthang leh ih minsiat nading zong baih mahmah ahih lam zong phawk sak nuam ing.” ci-in gen hi.

Tg Chhuanga in Mizogam, Tonsim(Champhai) ah zong Tukpeng hilhna nei ngei a, tulaitak Tedim Khuapi ah naupang 25 ahilh laitak ahi hi.

.............................................................................

Photo : Tg Chhuanga in naupangte tukpeng ahilh laitak limlak, Thaw Thawn.

Close[X]

© Copyright 2020 - The Tedim Post. Developed by Zawikawm | Privacy Policy