Opinion: A PARTY MAW A MI By Tg. Thang Suan Sian Khai

Opinion

Published on: 2020-07-08 19:21:54

THUPATNA

Zogam bek thamloh Myanmar gam sungah tulaitak i zak mun pian leh zong i theihnop khat ahi 2020 kiteelpi ah kuan hong kah a, kua in kumpi hong sem ding hiam, cih pen mipi kilunglut tek hi. Tua huhau mah in zong mipi sungah i tuahsa thute hangin ngaihsutna pawlkhat hong kilamdang tek a, 2020 kiteelpi ah vote bangci piak ding, a mi en ding maw a party en ding cih zong kiza mun mahmah ta hi. Hih thu tawh kisai Myanmar gambup ah a dem ding USDP te makai khat a kidotna ah “a mi” en un ci hi. NLD te makai khat a kidotna leuleu ah “a mi lah enin kuan kumpi lamzo ding, cih ngaihsun un” na ci uh hi. Tua leh ei Zogam ah e? Bang i en tam? I tuahsa ahi 2010 leh 2015 kiteelna ah tangmi i tel dan ento khawm in 2020 ading gal et khawm dih ni.

2010 KUM KITEELPI

Democracy gam khat adingin a thupi mahmah khat ahi thukhunpi (Constitution) pen galkap kumpi makai-in hong bawl uh hi a, 2008 kumin gambupah kipsakna kinei thei hi. Tua 2008 thukhunpi zui in party namkim kiteelna pen 2010 kumin kibawl pah a, gambup huamin USDP in hong zo ahih manin amau deih bangin kumpi hong lam uh hi. President Thein Sein in kumpi hong sem hi. Zogam ah zong Pu Hung Ngai in Chief Minister hong semin Tedim khuapi pan teelcing ahi Pu Nang Za Mung (sum vai) leh Tonzang pan Pu Cin Lian Pau (mei lam) te in vuanzi hong sem uh a, Pu Hau Khen Kham in Hluttaw Speaker hong sem uh hi. 2010 – 2015 sung Hluttaw makaipi eite ihi a, Chin State sum leh pai kizeek khempeuh eite khut sung mah hi-in mei lam khempeuh zong eite khut sung pan kivaihawm ahi hi.

A zenzen in amau teng in vote na ngah zo lo uh hi kha zenzen leh tua hun lai a minam party CNP leh CPP panin hi dan panmunte i ngah kha diam cih lungngaih huai hi. Ngah lo peuhmah zaw mai ding hi hang. Bang hang hiam cih leh mee tam nihna teng pen minam party ahih hang ahi hi. USDP in a thu vaihawmpih dingin a innkuanpihte lo buang hong la het lo ding hi. Tua ahih manin bangbang hileh mipite 2010 kiteelpi ah teel khiallo hihang! Mipi in 2010 kum kiteelpi ah a vaipuak zo mahmah a, i teelcin uliante in mipite tungah a vaipuak uh hong zo het lo suak hi. Gambup a gualzo party vote piak pong tawh lem zo het lo, cih hong phawksak hi.

2015 KUM KITEELPI

2015 kum kiteelpi ah i theihsa mah bangin Myanmar gambup ah a tamzaw NLD party in hong zo a kumpi zong amau lunggulh bangin hong lam leuleu uh hi. Zogam ah zong Pu Lian Luai makai in hong makaihna ah Tonzang khua pan teelcing ahi vuanzi Pu Pau Lun Min Thang(Social Affairs) leh vuanzi Pu Mang Hen Dal (Agriculture & Forestry) te tawh hong kithuahto uh a, tun Chin State kumpi (NLD + ZCD + Galkap) kum 5 hong cing ding hita hi. 2015 kiteelpi ah Zomi party hong thang mahmah a Tedim khuapi pan mun 3 leh Tonzang pan mun 3 ah a kigawm mun 6 hong zo uh hi. Pasian thupha tawh amau mun tek ah panmun pawlkhat tek zong hong ngah uh himah leh mipi lam pan lametna lianlua maw ahih kei leh teelcingte ngiat a kisam maw cih thei khang Tedim khuapi ah mipi pawlkhat in bel ngaihsut hong bangzo kei uh ci-in gen kiukiu uh hi. Tonzang khua ZCD party pan teelcing te bel Tonzang bek thamlo Tedim zong hong van zo uh ci-in Tonzang MP te tung lungdamna thu gingkhia zel hi.

2015 kiteelpi tawm khat enpha kik pak lai ni! A zenzen in Tedim pan i teelcing teng in hong ngahlo uh hi zenzen leh kua teng in hong ngahin bang a ci zaw tam? Kei mimal muhna ah ZCD party pan teelcing 3 te omlo hi leh NLD in hizah in mun hong pia in um keng. Bang hang hiam cih leh NLD tawh khutkilen khawm in kum tampi sung galkap kumpi a do khawmkhawmte ahi uh hang hi. USDP pan mi 2 (Pu Cin Khan Pau leh Pu Suan Do Cin) te teelcing loin ZCD MP Candidate 2 (Pi Kam Khan Dim & Pi Ciin Do Niang) te bang a na teelcing hi zaw leng khat beek bel vuanzi suak kha ding a, Zomite numei vuanzi nei ci-in ki-angtangh mahmah ding hi. NLD leh USDP sep khop sangin NLD leh ZCD sepkhop a lem zawk man ahi hi. Tonzang pan teelcing te bel lungkim huai leh hong van zo uh ahih manin angtanpih hang. Tua ahih manin Tonzang MP te enleng mipi ading nasepna ah minam party in zong na hoih na manpha tampi kisemthei hi, cih hong musak hi.

THUKHUPNA

Gambup huamin NLD mah hong hat kha ding hi. Chin State ah zong Chin Party a hanciam mahmah sam uh hangin NLD mah hat zaw dingin up huai hi. A dang party te bel a cing zo ding lamet huai khol lo tawh kibang hi. Tedim leh Tonzang panin en ni. NLD vote buak huan ding hi le hang i Candidate te pen Chin State NLD makaite in panmun hong piaksak takpi mah ding uh hiam, hong zahtaaksak ding uh hiam, qualification a nei uh hiam, cih ngaihsut huai hi. Tua banah Chin leh Zomi vai, Khalkha, Falam leh Tedim cih danin lungsim kineihna pen NLD vote piakna tawh veng pah khol lo kha ding hi. 2015 sangin Minam party ah ei na thahat bilbel lai le hang a hoih pen tam, cih khawng ngaihsut kaak ding hong om toto hi. Pasian in vote pia mipite tungah thumuhna leh lungpilna hong piak ding thu ka ngen hi.

MP Candidate te ii qualification i et siam hong thupi mahmah ding hi. Minam party i ci ta zongin tungsiah phu zo lo ding leh mipi hong thusim lo ding i teel khak leh kisum mahmah ding hi. Tuamah bangin gambup kumpi sem ding NLD ci-in ei lam pan i teelcinte pen mi lakah zat theih khol loh ding khawng ahih leh supna lianpi mah hong hi veve ding hi. Gambup level leh Chin State level ah sepzawhna ding tha bangzah nei, cih leh amah vote a pia mipite bek hi loin Tedim-Tonzang huam bang ciang hong it, hong vei, hong lainat, hong kipiakhia ngam… cihte en khawmin mipi in pilvang takin vote kipia ding hi, cih ka lamen hi.

………………………………….

Hih Opinion hong gelh Tg. Khaikhai pen Pastor En Khat Muan, Lawibual Baptist Church leh Nu Go Khan Lun te tapa upen hi a, tulaitakin Yangon School of Political Science ah a sep laitak ahi hi. Khua leh tui vai, gam leh minam vai a kin mahmah khangno khat ahih mah bangin ZYA Tedim leh Tedim Post media nasepnate ah volunteer semin a kihel den khangno muanhuai khat ahi hi. Tan 10 a zawh khit ciangin Diploma of Community Leadership and Social Studies pen Thabyay Education Foundation pan ngahin tulaitak University of Distance Education ah Law major(3rd year) a sin laitak ahi hi.

Close[X]

© Copyright 2020 - The Tedim Post. Developed by Zawikawm | Privacy Policy