News In Brief ⸺ THUTHAK TOMKIM ⸺

News In Brief

Published on: 2020-07-07 21:23:44

■ Chin State, Mindat Khuapi ah 2019-2020 State Budget MMK 632.32 Million tawh akilam laitak ahi Mindat College sanginn lamna 54% ki zota a, 2021-2020 pilsin kum pan sang kikah thei ta ding ci hi.

■ Chin State, Tedim Khuapi, Khuado hall ah 2020 kiteelpi hunah zuih ding thute kam kupna leh hilh cianna Township Election Comission makaihna tawh kinei hi. Tedim Township sungah veng 8 leh Ohsuh (Village tract) 55 om a, mee zum 131 koih dingin gelna nei uh ci hi.

■ Myanmar gam sungah 2020, June khasung ciang gamvai(politic) tawh thu kibawl mimal 641 om hi. Tua sung pan mi 35 pen thong kikhum a, mi 146 in thong sung pan thukhen zumah thukhen ding ngakin uh in, mi 460 in bel thong pualam pan thukhen ding ngakin thukhen zumah pai zel uh hi.

■ 2020 kiteelpi ah lokhote leh nitha nasemte taang dingin mi 11 in khattang(individual) in demna nei ding hi ci hi.

■ July 6, 2020 ciang Myanmar gambup ah tauhkui(nattun) ngah mimal 1740 om a, mimal 12 in hih natna tawh sihna tuak khin uh hi.

■ July 7, 2020 ni Leitung bupah Covid-19 natna ngah Tein 111 val(11,648,268), asi Tein 5 val (538,828) leh adam kik Tein 63 val (6,328,930) phata hi.

■ China(Sen) gam pan a kibawl ahi Tiktok app leh adang apps pawlkhat USA in khaktan ding cih ngaihsut laitak hi ci in genna nei uh hi. Tulaitak Leitung bupah Tiktok zang 2 Billion val bang hi.

■ Japan gam nitumna lamah guah tamluatna hangin tuicin tung a mi 40 bang si uh hi. Mipi tein 2 val bang inn leh lo nusia in kihem uh hi. A beisa 2019, October khasung in Typhoon huihkhauh nunna hangin mi 90 sih lawh hi.

■ Huihlak ah a leng ahi nin mal neu mahmahte lakah COVID-19 natna lungno mukhia ung ci-in gam 32 pan scientists 239 in WHO tungah genna nei uh hi.

....................................................................

Source : 7day news, Eleven Media, Myanmar Times, Taung zalat Times.

Close[X]

© Copyright 2020 - The Tedim Post. Developed by Zawikawm | Privacy Policy