■ Article: HLUTTAW THAK LEH KUMPI THAK KIPATZIA DING...By Tg. Thang Suan Sian Khai

Opinion

Published on: 2021-01-29 09:58:36

November 8, 2020 ni-in Myanmar gambup ah kiteelpi a kibawlna tungtawnin National League for Democracy (NLD) Party in Pyituh Hluttaw ah mun 315 lak pan mun 258, Amyotha Hluttaw ah mun 161 lak pan 138 leh State/Region Hluttaw ah mun 612 lak pan 501 cih bangin kidemna i 82% val bang tawh nasiatakin Myanmar gamhuam ahhong zo uh a, a dang munte pen mualmi party leh USDP party in hong kihel uh hi. ChinState ah zong Pyituh Hluttaw mun 9 lak pan mun 8, Amyotha Hluttaw a vekpi a mun 12 leh State Hluttaw mun 18 lak pan 16 cih bangin NLD party mah in gualzawhna hong ngah a, adangte pen ZCD pan mun 2 leh CNLD pan mun 1 cih bangin hong teelcing uh hi. Hluttaw Speaker te sapna tungtawnin February 1, 2021 in Pyituh Hluttaw leh Amyotha Hluttaw te kihong ding a, State Hluttaw pen ahih leh February 9, 2021 in kihong ding hi. Tua ahih manin a 3 veina Hluttaw meeting ah bang teng hong kisem masa ding uh hiam, cih 2008 thukhun tungtawnin kikum suk ni. Hih sungah Articles khempeuh pen 2008 thukhunpi sungate vive mah ahi hi.

PYITUH HLUTTAW

Amasa in Pyituh Hluttaw kibang ci lam cih gen masa ni. Pyituh Hluttaw i cih pen Tedim pan Pu Piang Suan Mung leh Tonzang pan Pi Cing Ngaih Mang te mun ahi hi. Pyituh Hluttaw pen article 109 tungtawnin a tampen mimal 440 tawh kilam ding a, mimal 330 ten Myanmar gambup a om township khat pan mi khatta leh galkap mangpa in ateel mimal 110 sang atam zawlo tawh a kilam ahi hi. 2021 February 1 ni Hluttaw a kah masak penpen ni un article 110 tungtawnin teelcing MP khat Pyituh Hluttaw Chairperson dingin hong teel ding uh a, tua nu/pa i makaihna tawh article 111 tungtawnin Pyituh Hluttaw Speaker leh Deputy Speaker dingin teelcing MP te sung pan hong teel ding uh hi. Hih Speaker te gel in kum 5 sung Pyituh Hluttaw makaih ding uh hi. Pyituh Hluttaw pen article 123 tungtawnin kiteel zawh ni 90 sungin meeting saploh phamawh hi. Article 128 tungtawnin Pyituh Hluttaw meeting masa penpen ah a kah thei ding teelcing alang sang a tam zawk kei leh meeting kipan theilo ding hi. A zenzen in Hluttaw kah ding alang sang a tam zawk kei leh meeting kikhin ding hi.

AMYOTHA HLUTTAW

Amyotha Hluttaw i cih pen Tedim pan Pu Hang Khan Lian, Pu Thang Do Cin leh Tonzang pan Pu Cin Suan Mang te mun ahi hi. Amyotha Hluttaw pen article 141 tungtawnin mimal 224 sang atam zawlo tawh kilam ding hi. Amyotha Hluttaw pen State leh Region khatta pan mimal 12 ta bek kikah thei a, galkap mangpa seh mimal 56 tawh kigawm teelcing teng tawh a kilam Hluttaw ahi hi. Article 142 tungtawnin Amyotha Hluttaw kah masak pen ni-in Pyituh Hluttaw dan mah in Amyotha Hluttaw Chairperson teel in, tua Chairperson makaihna tawh Amyotha Hluttaw Speaker leh Deputy Speaker ding teel ding uh hi. Tua tegel in kum 5 sung Amyotha Hluttaw makaih ding uh hi. Amyotha Hluttaw term pen article 154 tungtawn in Amyotha Hluttaw term kipan hun pen Pyituh Hluttaw tawh ani kibang hi ding hi ci hi. Pyituh Hluttaw kipat zawh ni 7 sungin Amyotha Hluttaw saploh phamawh hi. Amyotha Hluttaw zong Pyituh Hluttaw mah bangin meeting kipat masak penpen ni-in teelcing alang sang a tamzaw kah kul hi.

PYIDAUNGSU HLUTTAW

Pyidaungsu Hluttaw pen article 74 tungtawnin atunga i gensa ahi Pyituh Hluttaw leh Amyotha Hluttaw akigawm Hluttaw-pi ahi hi. Hih Pyidaungsu Hluttaw sungah Speaker leh Deputy Speaker ding pen article 76 tungtawnin Hluttaw kipat ni pan kha 30 sung Amyotha Hluttaw Speaker leh Deputy Speaker hi ding a, akisam lai term khempeuh pen Pyituh Hluttaw Speaker leh Deputy Speaker te in vaipuak la ding uh hi. Pyidaungsu Hluttaw sap hun ding pen article 78 tungtawnin Pyituh Hluttaw sap masak pen zawh ni 15 sungin saploh phamawh hi. Adiakdiak in hong tung ding Pyidaungsu Hluttaw ah asep ding uh in article 60 tungtawn in kumpi hong teel ding uh hi.

i. Kumpi teel zia

(a) Pyituh Hluttaw pan in teelcing tengin Kumpi dingin a deih uh mi khat teelcing hita leh hita kei leh amau ut peuhpeuh khat hong teel ding uh hi.

(b) Amyotha Hluttaw pan in zong teelcing teng mahin Kumpi dingin a deih uh mikhat hong teel ding uh hi. Teelcing hita leh hita kei leh phamawh lo hi.

(c) Pyituh Hluttaw leh Amyotha Hluttaw a kah ding galkap mangpa teel teng ahi mimal 166 teng in Kumpi dingin a deih uh khat hong teel ding uh hi. (Teelcing’ kul sese lo)

Hih bangin Pyidaungsu Hluttaw ah Kumpi dingin a deih uh mi 3 hong pulak khit uh ciangin vote khai ding uh a, vote tam ngah penpen in Kumpi(President), vote tam ngah nihna pen Vice President 1 leh vote tawm penpen Vice-President 2 cih bangin Pyidaungsu Hluttaw kah khempeuh in hong teel ding uh hi.

STATE HLUTTAW

State Hluttaw pen Tedim pan Pu Mang Hen Dal, Pu Thang Tuan Pau leh Tonzang pan Pu Pau Lun Min Thang,Pu Kam Khen Mang cih te mun ahi hi. State Hluttaw pen State bup a om township khat pan teelcing mi 2 ta leh teelcing khempeuh vekpi gawm seh thum suah seh khat galkap mangpa seh teng tawh a kilam Hluttaw ahi hi. State Hluttaw a kah masak pen ni-un Pyituh Hluttaw mah bangin State Hluttaw Chairperson ding teel in, tua makaihna tawh article 163 zui in State Hluttaw Speaker leh Deputy Speaker teel ding uh hi. State Hluttaw term pen Pyituh Hluttaw term tawh kikim a, Pyituh Hluttaw meeting a sap zawh ni 15 sungin State Hluttaw meeting saploh phamawh hi.

Hih teng pen Myanmar gam 2008 thukhunpi tungtawn in a kikum suk i hihi.

.............................................

Etkak: 2008 Upadi: UEC, NLD & DVB facebook pages.

Close[X]

© Copyright 2020 - The Tedim Post. Developed by Zawikawm | Privacy Policy