■ Opinion I KI DAHPIHNA AH.... By Lia Cing Van Kim

Opinion

Published on: 2021-01-28 17:39:04

Nidangin ahih leh sihna manna i tuah tak teh maan zaih ding mi kicial hi. Dahna a tuak innkuan khat in maan zaih siapa khat sam uh a, tua maan zaih siapa in siluang maan a zaih ding teh, “Ready, 1,2,3 … thek,” ci kha citciat ahih na ciamnuih gensawn ah kiza thei zeel hi. Maan zaih pa in maan ong sawp sak a, tua maan pen innkuan pihte in kikem hi.

Tulai khuahun luanzia tawh kituak-in mi khempeuh in phone kitawi tekta ahih manin i ciapteh nop peuhpeuh zong i tuntun na ah phone camera tawh ki zaih ziauziau thei ta hi. Tua bek thamlo-in mikim in social media kizang ciat ta hi.

Kizopna a baih deuh manin kidop ding phawk huai pawlkhat zong om hi. Misi khatpeuh om leh liit dawk bangmah in i phone neih ciat tawh maan kila ngeingai thei hi. A maitang le a pumpi bup dawksak deda in zaih bek thamlo, social media ah kikhah sak gawp thei hi. Tua bek hileh phadawm, innkuan pihte kiangah “a maan hong khak ve” ci-in nget beh lailai banah hong ana manin maan hong khak teh social media ah kikhah sak mang thei sawnsawn hi.

A nai-a om lo te ading i deihsakna hi napi tua bang dan limlak te I muh ciangin mitkha ah luaiden thei mawk hi. “Misi in double dignity nei hi,” ci-in sia Thawn Khai in a gen ngei ka phawk kha hi. A nungta lai te in ama’ lim a kilawmlo mu leh hong lakkhiat sak in, ci-in phuul kik thei hi napi, a si khat in tua dan respond thei nawnlo ahih manin kidop mahmah ding ahi hi (Thang Deih Tuang’s Facebook, 5 Sep 2018 post).

A zenzen in a gamla ah a om te thu zaksak nading maan zaih a kulleh a innkuan pih taktak (Close family) te kiangah phalna nget masak huai hi. Innkuan pihte in hong phal takpi a, zaksak a kul ngeingei phial leh zong private message pan kikhak thei hi. Ahih theih leh limlaak zaih sak seloh mah hoih hi. A limlaak post nuam veve i hih leh a damlai maan hoihte post sak zawk ding kilawm hi.

A nusiat a innkuan pihte tag in laigelh gawp zong khat veivei teh kilawm lo thei hi. Banghang hiam cihleh kum sim memory ah na dawk zeel ding a, thaksuak sak zeelzeel bek thamlo, lungleng kamh sak ngeilo hi. I hopih nop teh private message kikhak thei a, ki hopih thei hi. A beisa hunte i sialsial pih sangin mailam ah thakhauh takin a kalsuan theih nading uh thapiak zawk ding ahi hi. Khat veivei teh dai dide-a omna zong i huh theih penna hi thei lai hi.

Tua banah Covid-19 natna hong laang takteh a si, a na tampi ki om khin ta hi. Tua bang te ah kumpi lamte in case 1, 2, … cih bang danin nambat tawh kiciamteh a, cina te’ min a kipan a ma’ thu te pen pulak sak lo-in kemcing uh hi. Tua pen “confidentiality” kici hi. Tua bangin hong nusia a om phial leh zong mite linglawng lipkhap theihtheih nadingin gelh lo a, zahtakna tak tawh kidawm kawm sa-in zaksak siam ding thupi mahmah leuleu hi. Ei diak bang i community neu banah khat le khat kithei tel mahmah lai i hih manin mi khatpeuh privacy i zahtak sak ding kisam zaw tham lai hi.

I nuntak laitak aktui aktak kipia zolo/kiphawk kha hetlo napi, i sih khitteh kamsiam kipaih ngutngut banah sa i kigawh zo bilbel hi. Nuntak laitak hi taleh nuntakna a bei hun teh hi taleh, a kihuai siam, hehpih siam, thuakpih siam le dahpih siamte i hih nading lunggulh huai mahmah hi.

Tua banah Facebook reaction “a kap – sad” ? lim piakna pan “a don – care” lim piakna kal thak ah kalsuan theih nading lunggulh huai mahmah hi.

..........................................................

Hih Opinion pen Laigelh Lia Cing Van Kim' phalna tawh aki suaksak ahi hi.

Close[X]

© Copyright 2020 - The Tedim Post. Developed by Zawikawm | Privacy Policy